رمضان في مصر معروف انه موسم المسلسلات، وعلي مدار السنين مسلسلات رمضان بقت جزء من الموروث الشعبي. كل البيوت بقى فيه عادة ثابتة طول شهر رمضان وهي الفرجة علي المسلسلات مع العائلة على الفطار وخلال السهرة. المسلسلات الرمضانية بقت جزء من الذاكرة الجمعية .. بتوثّق شكل المجتمع، همومه، أحلامه، وطريقة كلامه. صحيح في السنين الأخيرة جودة المسلسلات قلت كتير عن زمان لأسباب يطول شرحها، بس ده عمره ما كان سبب كافي لان احنا نبطل نتفرج علي المسلسلات كل سنة. وفي آخر ١٠ سنوات، فيه مسلسلات قدرت جودتها تتفوق علي المستوي المتوسط لباقي المسلسلات وقدرت تسيب علامة، وتطرح قضايا مهمة، وتشجع علي المناقشات
دي قائمتي الشخصية لأفضل ١٠ مسلسلات رمضانية في آخر ١٠ سنين
١٠. إخواتي (٢٠٢٥)
تأليف: مهاب طارق – إخراج: محمد شاكر خضير – بطولة: نيللي كريم، روبي، كندة علوش، جيهان الشماشرجي، علي صبحي، حاتم صلاح
مسلسل مختلف جدا في ايقاعه وعبثيته وتألق فريق أبطاله. يمكن النهاية كانت أضعف من اللازم الا ان معظم حلقات المسلسل كانت أكتر من ممتاز
٩. نيللي وشريهان (٢٠١٦)
تأليف: مصطفى صقر، محمد عز الدين – إخراج: أحمد الجندي – بطولة: دنيا سمير غانم، إيمي سمير غانم، مجمد سلام، مصطفي خاطر
ده تقريبا آخر مسلسل كوميدي حبيته وحبيت أتابعه. كيمياء مذهلة بين كل الأبطال، مواقف كوميدية حقيقية، وضحك كتير من القلب
٨. أهو ده اللي صار (٢٠١٩)
تأليف: عبد الرحيم كمال – إخراج: حاتم علي – بطولة: روبي، أحمد داود، محمد فراج، سوسن بدر، أروي جودة، علي الطيب
حكاية شعب ممتدة عبر ١٠٠ سنة. الفن، والظلم، والحب، وتاريخ الإسكندرية. عمل شاعري، موسيقي عظيمة، كتابة وحوارات ممتعة، وتمثيل صادق
٧. جراند أوتيل (٢٠١٦)
تأليف: تامر حبيب – إخراج: محمد شاكر خضير – بطولة: عمرو يوسف، أمينة خليل، محمد ممدوح، أحمد داود، دينا الشربيني
رغم ان القصة مقتبسة، الا ان الكتابة والإخراج وأماكن التصوير والأزياء والديكورات كلهم ساهموا اننا نشوف قصة مصرية مؤثرة مع تمثيل متقن جدا خصوصا من محمد ممدوح اللي المسلسل ده حطه علي طريق النجومية
٦. تحت الوصاية (٢٠٢٣)
تأليف: خالد دياب، شيرين دياب – إخراج: محمد شاكر خضير – بطولة: منى زكي، دياب، رشدي الشامي، خالد كمال، أحمد خالد صالح
عالم جديد ماشوفناهوش قبل كدة، قضية حقيقية، ونقاشات واسعة عن قوانين الوصاية والولاية على الأطفال
٥. هذا المساء (٢٠١٧)
تأليف: تامر محسن، مها الوزير، وورشة كتابة – إخراج: تامر محسن – بطولة: إياد نصار، أروى جودة، محمد فراج، حنان مطاوع، أحمد داود، أسماء أبو اليزيد
مسلسل تناول قضية جديدة وشائكة، وفتح نقاش كبيرعن الخصوصية والعلاقات. تفاصيل الشخصيات كانت في منتهي الاتقان، والتمثيل والكتابة والإخراج كانوا في أعلي مستوي
٤. لام شمسية (٢٠٢٥)
تأليف: مريم نعوم، ورشة كتابة – إخراج: كريم الشناوي – بطولة: أمينة خليل، أحمد السعدني، علي البيلي، محمد شاهين، يسرا اللوزي، أسيل عمران، ثراء جبيل
يمكن ده أكتر مسلسل عمل ضجة الفترة اللي فاتت بسبب الموضوع الحساس جدا جدا اللي بيتناوله. كتابة هايلة، وأداءات تمثيلية ممتازة، وإخراج ناضج وواعي، وتناول راقي جدا جدا لموضوع حساس لحد النهاية اللي للأسف بوظت كل حاجة. لولا النهاية دي، المسلسل كان أكيد هيكون في مكانة تانية خالص
٣. صلة رحم (٢٠٢٤)
تأليف: محمد هشام عبية – إخراج: تامر نادي – بطولة: إياد نصار، يسرا اللوزي، أسماء أبو اليزيد، محمد جمعة
من المسلسلات اللي تناولت موضوعات شائكة وحساسة جدا. كتابة رائعة، وإخراج متمكن، وتمثيل يلمس القلب، ونهاية محفورة في قلوبنا كلنا
٢. الهرشة السابعة (٢٠٢٣)
تأليف: مريم نعوم، ورشة كتابة – إخراج: كريم الشناوي – بطولة: أمينة خليل، محمد شاهين، علي قاسم، أسماء جلال
من أكتر المسلسلات الواقعية عن ملل العلاقات وخصوصا في الزواج بعد سنين. الخلافات، الخناقات، ومحاولات الإصلاح. أعتقد ناس كتير شافت نفسها في التفاصيل الصغيرة اللي المسلسل رسمها بعناية
١. لعبة نيوتن (٢٠٢١)
تأليف: تامر محسن، مها الوزير، ورشة كتابة – إخراج: تامر محسن – بطولة: منى زكي، محمد ممدوح، محمد فراج، سيد رجب، عائشة بن أحمد
مسلسل مذهل في التفاصيل، أداءات تمثيلية علي أعلي مستوي، اخراج عبقري، وادارة ايقاع من أروع ما يكون. مستوي الأداء من مني ذكي ومحمد ممدوح ومحمد فراج في المسلسل ده يمكن هو الأعلي في كل تاريخهم. حالة الترقب اليومي اللي المسلسل ده عملها وقت عرضه كانت غير مسبوقة
